Prins Cletus I

Adjudanten: (AAP) Dennis Maessen, (AAP) Jeroen Theelen, Ronald Meijers

Nao 2 corona-jaore is de 62ste prins van De Nachtegale Cletus Dokter. Es prins Cletus I geit hae regere mit zien liefsjpreuk:

                   Veer sjliete uch de vastelaovend!

Cletus is 46 jaor en woont saame mit Sandra en zien 2 hundjes oppe Duuperwaeg.

Cletus is in ut dageliks laeve oetbater van Mitra Remunj. Hae heat dus get mit drank, mer auch weer neet. Cletus is eine alcoholvrieje prins.
Alcoholvrie is der auch blie. Mer verkaupe kint der es de beste. Kom gezellig bie um langs veur de lekkerste drenkskes en de sjoonste cadeautjes.

Cletus woont sinds 2011 in Azerao, en is dus gein Azeraose jong. Opgegreujd is der oppe Donderberg, en dus is der auch ein klein Donderbölke. Azerao is inmiddels zien toes, zeker vanaaf det der in 2012 adjudant waerde van AAP Dennis I. Sinsdien is der auch lid van de Raod van Ellef van de Nachtegale, det sjmaakte immers nao meer. Verder haet Cletus actief gevoetbald bie RKAVC mer laot der zich noe leever aaf en toe zeen bie de derde helft.

Op zien vastelaovend-CV steit verder nog Calimero Cletus I in 2014 (“tok-tok, fees in ut kippehok”) mit zien handlangers Aap Dennis I en Roland Meijer. Auch det woor ein sjitterende tied.

Noe geit der dit seizoen dus es veurgenger van De Nachtegale fees viere, ein dreum dae oet kump.

Es adjudante haet Cletus gekaoze veur zien vrunj AAP Dennis I (Maessen), AAP Jeroen I (Theelen) en Roland Meijer. Saame hubbe ze eine bak ervaring binne de vastelaovend. Deze 3 heere motte derveur zorge det Cletus alcoholvrie blief, dus alle pilskes mit alcohol die Cletus krieg motte op ein of angere manier verdwiene. Det wirt hél werke veur die manne!

Adjudanten

Dennis Maessen

In 2012 woor Dennis veurgenger van de Nachtegale, mit Cletus es adjudant. Onger ut motto “Mit vastelaovend zeuk ich de grens op” woor det ein sjoon seizoen. Noe zeen de rolle omgedreijd en moog Dennis Cletus de vot nao draage. Dennis is eine echte Azeraose jong, is getrouwd mit Marlou, trotse papa van Bram en Cas en woont Oppe Maalberg. Dennis werkt bie ut Kadaster, dus es der get mot waere gemaete, kins se Dennis belle.

Jeroen Theelen

In 2016 woor Jeroen veurgenger van de Nachtegale, en weer woor Cletus adjudant. Es echte supermanne waerde der door de vastelaovend gevlaoge. “Mit de tent oppe kop, gaon veer super manne” heurde se euveral. Noe moog Jeroen zien super-krachte inzitte om Cletus te helpe mit zien prinssjap. Auch Jeroen is eine echte Azeraose jong, gertouwd mit Ingrid en trotse papa van Emma en Sophie en woont Oppe Maalberg. Es oetbater van Het Spikkerdal haet der jaorenlang gezorgd veur eine grote glimlach bie veul miense.

Roland Meijer

Roland is gebaore in Den Haag mer woont al heel lang oppe Donderberg. Jaorelang is der lid van de Raod van ellef van de Donderböl gewaes, maar auch de Azeraose vastelaovend is Roland neet vraemd. Es handlanger van Calimero Cletus I in 2014 haet der zich al good laote gelden in Azerao. Auch haet der saame mit Cletus jaorenlang gedart bie De Keizer. Ziene bienaam binne det team woor Vastelaovend, helemaol neet vraemd want hae had altied de sjoonste pekskes aan. Hae is saame mit Esther en trotse papa van Sanne en Mika. In ut dagelijks laeve is der sjtoringsmonteur bie Stadler Rail.